Gəncə şəhərində gənc şahmatçılar üçün ilin ən vacib yarışlarından biri start götürüb. 8-18 yaşlı idmançılar arasında Azərbaycan çempionatının final mərhələsi Gəncə İdman Sarayında təşkil olunub və ölkənin müxtəlif bölgələrindən seçilmiş istedadlı şahmatçılar burada mübarizə aparır.
Yarış Azərbaycan Şahmat Federasiyası tərəfindən keçirilir və iştirakçılar yaş qrupları üzrə həm oğlanlar, həm də qızlar arasında qalibləri müəyyən etmək üçün yarışırlar. Turnir 8, 10, 12, 14, 16 və 18 yaş kateqoriyalarını əhatə edir.
Qalibləri beynəlxalq yarışlar gözləyir
Çempionat yalnız ölkədaxili titul uğrunda deyil, həm də beynəlxalq arenaya çıxış üçün mühüm mərhələ hesab olunur. Mövcud qaydalara əsasən, hər yaş qrupunda birinci yeri tutan şahmatçılar 2026-cı ildə keçiriləcək dünya və Avropa çempionatlarında Azərbaycanı təmsil etmək hüququ qazanacaqlar.
İkinci pillədə qərarlaşan iştirakçılar isə Avropa çempionatına vəsiqə əldə edəcəklər. Bununla yanaşı, son illərdə formatı dəyişdirilən bəzi yaş qrupları üzrə – xüsusilə 8, 10 və 12 yaş kateqoriyalarında – uğur qazanan şahmatçılar Dünya Kubokunda iştirak etmək imkanı əldə edəcəklər.
Bu sistem gənc idmançıların inkişafına və beynəlxalq təcrübə qazanmasına şərait yaradır. Yarışın gərgin mübarizə şəraitində keçdiyi və bir çox perspektivli şahmatçıların diqqət çəkdiyi bildirilir.
Qeyd edək ki, Azərbaycan çempionatının final mərhələsinə martın 30-da yekun vurulacaq və qaliblərin adları həmin gün rəsmən açıqlanacaq.
