Azərbaycanın gimnast qızları Adriatik dənizi sahillərində keçirilən Dünya Kubokunda iki bürünc medal qazanıb. Yarışlar məşhur opera bəstəkarı Coakkino Rossinin vətəni olan İtaliyanın kurort şəhəri Pesaroda, Adriatic Arena-da keçirilib.
Azərbaycan Gimnastika Federasiyasının məlumatına görə, milli komandanın lideri Aliyə Qarayevanın bu yarışda əldə etdiyi nəticə üçüncü yer olub. O, çoxnövçülükdə altıncı yerə yüksəlmiş, dörd finaldan üçündə çıxış edib. Əsas uğurunu yarım dəqiqəlik dəyənəklərlə hərəkətdə əldə edərək üçüncü yeri tutan Qarayevanın lentlə və top ilə çıxışları müvafiq olaraq dördüncü və səkkizinci yerdə tamamlanıb. O, rusiyalı rəqibləri Yevgeniya Kanayeva və Darya Kondakovaya cüzi fərqlə məğlub olub.
İkinci bürünc medalı isə 14 yaşlı Nilüfər Niftəliyeva qazanıb. Yeniyetmələr turnirində dəyənəklərlə hərəkət üzrə finalda üçüncü yerə çıxaraq, ilk iki yeri tutan Rusiya və İtaliya təmsilçilərinə cüzi fərqlə uduzub. Həlqə ilə çıxışda isə yeddinci olub, həmçinin Gülsüm Şəfizadə ilə birlikdə komanda yarışında altıncı yeri tutublar.
Dünya Kubokunun digər iştirakçılarından Ləla Yusifova 45 idmançı arasında 21-ci, qrup komandası isə 14-cü olub.
Bu həftəsonu həm böyüklər, həm də yeniyetmələr Budapeştdə keçiriləcək beynəlxalq turnirdə iştirak edəcəklər.
Bu arada, Ufa şəhərində keçirilən yarışlarda gənc azərbaycanlı gimnastlar da uğur qazanıb. Bakı Gimnastika Məktəbinin yetirmələri olan İlahə Məmmədova və 9 yaşlı Darya Fərşbaxşahriyari öz yaş qruplarında qələbə qazanıblar, Vəfa Həsənzadə isə “Miss Plastiklik” adına layiq görülüb.
