UFC-nin iki çəki dərəcəsi üzrə sabiq çempionu Konor Makqreqor UFC 329 turnirində Maks Holloueyə texniki nokautla uduzmasına baxmayaraq, gecənin ən çox qazanan döyüşçüsü olub. Xarici KİV-in yaydığı məlumata görə, irlandiyalı idmançının bu qarşılaşmadan əldə etdiyi gəlir 15,04 milyon dollar təşkil edib.
Məlumata əsasən, əsas döyüşün qalibi Maks Hollouey isə 5,08 milyon dollar qazanıb. UFC ənənəvi olaraq döyüşçülərin rəsmi qonorarlarını açıqlamadığından, bu rəqəmlər müxtəlif mənbələrin hesablamalarına əsaslanır.
Döyüş cəmi 69 saniyə davam etdi
37 yaşlı Makqreqorun beş illik fasilədən sonra oktaqona qayıdışı uğursuz alınıb. Döyüşün ilk dəqiqəsində rəqibinə hücum etməyə çalışan irlandiyalı zərbə zamanı sağ ayağından xəsarət alıb. Bundan sonra o, bir neçə dəfə tarazlığını itirərək yerə yıxılıb və hakim qarşılaşmanı dayandıraraq Maks Holloueyə texniki nokautla qələbə verib. Döyüş cəmi 69 saniyə davam edib.
UFC prezidenti Dana Uaytın sözlərinə görə, ilkin tibbi müayinələr Makqreqorun ön çarpaz bağını (ACL) zədələdiyini göstərir. Döyüşçünün məşqçisi Con Kavanaq isə bildirib ki, qarşılaşmadan əvvəl onun ayağı ilə bağlı heç bir problem olmayıb.
Makqreqor məğlub olsa da, UFC 329 böyük kommersiya uğuru qazanıb. Las-Veqasda keçirilən turnir həm bilet satışından əldə olunan gəlir, həm də azarkeş marağı baxımından təşkilat tarixinin ən uğurlu tədbirlərindən biri olub.
