İspaniyanın “Barselona” klubu yay transfer pəncərəsinin ən səs-küylü keçidlərindən birini reallaşdırmağa çalışır. Kataloniya təmsilçisinin əsas hədəfi “Mançester Siti”nin və İspaniya millisinin yarımmüdafiəçisi Rodri Ernandesdir. Hesablamalara görə, transfer baş tutacağı təqdirdə futbolçu üçün ümumi xərc 210 milyon avronu keçə bilər. Bu məbləğə transfer haqqı, əməkhaqqı, vergilər, eləcə də bonus və komissiyalar daxildir.
Transfer dəyəri sürətlə artır
Məlumata əsasən, “Mançester Siti” 30 yaşlı yarımmüdafiəçini buraxmaq üçün təxminən 80 milyon avro tələb edir. “Barselona” isə daha əvvəl 60 milyon avro sabit ödəniş və 10 milyon avro bonusdan ibarət təklif təqdim etsə də, İngiltərə klubu bu variantı qəbul etməyib. Hazırda Kataloniya təmsilçisi danışıqları sürətləndirməyə çalışır və yaxın günlərdə yekun qərarın verilməsini istəyir.
Rodrinin “Barselona” ilə dörd illik müqavilə imzalayacağı gözlənilir. İllik 15 milyon avro xalis maaş nəzərə alındıqda, vergilərlə birlikdə klubun futbolçuya hər mövsüm təxminən 30 milyon avro ödəyəcəyi hesablanır. Beləliklə, yalnız əməkhaqqı xərci dörd il ərzində 120 milyon avroya yaxınlaşır. Transfer haqqı da əlavə edildikdə ümumi məbləğ 200 milyon avroya çatır, bonuslar və agent komissiyaları ilə birlikdə isə 210 milyon avro həddini keçir.
Danışıqlar həlledici mərhələyə çatıb
Rodrinin “Mançester Siti” ilə müqaviləsi 2027-ci ilin yayına qədər qüvvədə olsa da, ispaniyalı futbolçunun karyerasını vətənində davam etdirməyə müsbət yanaşdığı bildirilir. Bununla yanaşı, “şəhərlilər” iki təklifi geri çeviriblər və klub rəhbərliyi yalnız onları qane edəcək maliyyə şərtləri formalaşacağı halda transferə razılıq verəcək. “Barselona” isə yarımmüdafiəçini Joan Qamper Kubokundan əvvəl heyətə qatmaq niyyətindədir və tərəflər arasında danışıqlar davam edir.
