“Barselona” heyətini Xorvatiya millisinin təcrübəli qapıçısı Dominik Livakoviçlə gücləndirib. Kataloniya klubu 31 yaşlı futbolçunun Türkiyənin “Fənərbağça” klubundan transferini rəsmən açıqlayıb.
Tərəflər arasında imzalanan müqavilə dörd mövsümü əhatə edir. Razılaşmaya əsasən, Livakoviç 2030-cu il iyunun 30-dək “Barselona”ya məxsus olacaq.
Xorvatiyalı qapıçı 2023-cü ilin yayında Zaqreb “Dinamo”sundan “Fənərbağça”ya keçmişdi. O, İstanbul təmsilçisinin heyətində iki mövsüm ərzində ümumilikdə 74 qarşılaşmada meydana çıxıb və bunların 24-də qapısını toxunulmaz saxlayıb. Daha sonra “Jirona”ya icarəyə verilsə də, İspaniya klubunda rəsmi oyuna çıxmayıb. 2026-cı ilin qış transfer dövründə isə icarə əsasında yenidən Zaqreb “Dinamo”suna qayıdıb.
Livakoviç karyerasının ən uzun mərhələlərindən birini məhz “Dinamo”da keçirib. Təcrübəli qolkiper Zaqreb klubunda yeddi mövsüm ərzində 295 matçda iştirak edib, 137 qarşılaşmada qol buraxmayıb və yeddi dəfə ölkə çempionu olub.
Livakoviç 2017-ci ildən Xorvatiya millisinin üzvüdür. O, 2018, 2022 və 2026-cı illərdə keçirilən dünya çempionatlarında, həmçinin 2021 və 2024-cü illərin Avropa çempionatlarında milli komandanın heyətində yer alıb. Qapıçı Xorvatiyanın 2018-ci il mundialında gümüş, 2022-ci ildə isə bürünc medal qazanan heyətinin üzvlərindən olub.
