Zöhrə Ağamirova idman karyerasını başa vurdu
Azərbaycan bədii gimnastika millisinin lideri Zöhrə Ağamirova idman karyerasını başa çatdırdığını açıqlayıb. Bu barədə 23 yaşlı gimnast Bakıda start götürən beynəlxalq “Qış nağılı” turniri zamanı bildirib.
Zöhrə Ağamirova bədii gimnastikada Azərbaycanın ən uğurlu idmançılarından biri hesab olunur. O, 2017 və 2021-ci illərdə keçirilmiş İslam Həmrəyliyi Oyunlarında qızıl medal qazanıb. Ağamirova həmçinin Avropa çempionatının bürünc, Universiadanın gümüş medalçısı olub və Tokio-2020, Paris-2024 Yay Olimpiya Oyunlarında iştirak edib.
Azərbaycan idman tarixində dəyərli iz qoyan Zöhrə Ağamirova öz uğurları ilə yeni nəsil gimnastlara ilham verib. Karyerası boyunca əldə etdiyi nailiyyətlər onun bədii gimnastika sahəsində əvəzsiz töhfəsini nümayiş etdirir.
