17 yaşlı ispan hücumçu Lamin Yamal bu yay “Barselona” klubu ilə yeni müqavilə imzalayacaq. Yeni razılaşma 2030-cu ilə qədər nəzərdə tutulub.
Mənbənin verdiyi məlumata görə, futbolçunun agenti Jorje Mendiş Lissabonda “Barselona”nın prezidenti Joan Laporta və idman direktoru Deku ilə görüşməyi planlaşdırır. Bu görüşün UEFA Çempionlar Liqasının 1/8 final mərhələsində “Benfika” ilə oyun zamanı baş tutması gözlənilir.
“Benfika” və “Barselona” arasında Çempionlar Liqası matçı 5 mart tarixində keçiriləcək. Görüş Bakı vaxtı ilə saat 00:00-da başlayacaq.
Cari mövsümdə Lamin Yamal “Barselona”nın heyətində bütün turnirlərdə 33 oyunda iştirak edib. O, bu qarşılaşmalarda 11 qol vurub və 16 məhsuldar ötürmə edib. Gənc futbolçunun hazırkı müqaviləsi 2026-cı ilin yayına qədər qüvvədədir. Transfermarkt portalının məlumatına görə, Lamin Yamalın bazar dəyəri 180 milyon avro təşkil edir.
