Mirra Andreeva, WTA 1000 turnirində qalib gələn ən gənc tennisçi oldu. 17 yaş 299 günlük rusiyalı tennisçi şənbə günü Dubai Duty Free Tennis Championships turnirində Klara Tausonu məğlub edərək tarixi nailiyyətə imza atdı.
Bu qələbə ilə Andreeva dünya reytinqində ilk 10-luğa daxil oldu, bunu bacaran ən gənc oyunçu olaraq 2007-ci ildə Nicole Vaidisovadan sonra bir ilkə imza atdı.
Finalda qələbə və emosional anlar
Gərgin keçən final görüşü 1 saat 46 dəqiqə davam etdi. Andreeva 7-6 (1), 6-1 hesabı ilə 22 yaşlı Klara Tausonu məğlub edərək çempion oldu. Qələbəni qazandıqdan sonra dizləri üstünə çökərək sevinən gənc tennisçi daha sonra azarkeşlərə təşəkkürünü bildirdi.
“Son olaraq özümə təşəkkür etmək istəyirəm”, – deyə o, kortdakı çıxışında zarafatla bildirib. “Mən nələrlə üzləşdiyimi bilirəm və hər zaman özümə inandığım üçün özümə təşəkkür edirəm”, – sözlərini əlavə edərək tamaşaçıların gülüşünə səbəb olub.
Müxtəlif rəqiblərlə çətin yol
Həm Andreeva, həm də Tauson öz ilk WTA 1000 finalına çıxırdılar. Finala gedən yolda Andreeva beşqat “Böyük Dəbilqə” çempionu İga Świąteki dörddəbir finalda, dünya 7-cisi Elena Rıbakinanı isə yarımfinalda məğlub etdi. Tauson isə 1 nömrəli Aryna Sabalenkanı 1/8 finalda turnirdən kənarlaşdıraraq sürprizə imza atdı.
Finalın əvvəlində hər iki oyunçu bərabər mübarizə aparırdı. Andreeva ilk servis oyununda iki ardıcıl cüt səhv edərək servisini qırdırdı, lakin geri dönüş edərək ilk seti tay-brekdə dominant oyunla qazandı. İkinci setdə Andreeva daha rahat görünürdü. 3-1 hesabı ilə önə keçdikdən sonra üç breyk xalını xilas edərək üstünlüyünü qorudu və ardıcıl oyunları qazanaraq çempionluğunu rəsmiləşdirdi.
Mükafat pulu və gələcək hədəflər
Qələbəsinə baxmayaraq, hələ 18 yaşına çatmadığı üçün Andreeva qazandığı 597 min dollarlıq mükafat pulunu öz hesabına köçürə bilmir.
“Bütün suallar atama”, – deyə o, zarafatla bildirib. “Hələ şəxsi hesabım yoxdur, çünki 18 yaşım tamam olmayıb. Pul atamın kredit kartına köçürüləcək. Ümid edirəm ki, mənə bir az xərcləmək üçün pul saxlayar – məsələn, cips və kola almaq üçün”, – o, gülümsəyərək əlavə edib.
Reytinqdə 14-cü pillədən 9-cu yerə yüksələn Andreeva, ilin əvvəlində hədəfi olan ilk 10-luğa daxil olmağı artıq bacardığını bildirib. İndi isə ilin sonuna qədər ilk 5-liyə yüksəlmək üçün mübarizə aparacağını açıqlayıb:
“Çox maraqlıyam, görək bu hədəfə çata biləcəyəmmi”, – deyə WTA-ya verdiyi açıqlamada bildirib.
