Indian-Uellsdə keçirilən ATP 1000 turnirində 1/8 finala yüksələn ilk tennisçilər müəyyənləşib. Martın 10-na keçən gecə əsas setkada üçüncü raund qarşılaşmaları baş tutub. Gözlənilməz nəticələr və sensasiyalı qaliblər turnirə əlavə maraq qatıb.
Tallon Qriekspor, iki gün əvvəl turnirin əsas favoritlərindən biri olan Aleksandr Zverevi məğlub etdikdən sonra uğurunu davam etdirərək, Giovanni Mpeşi-Perrikari məğlub edib. Onun növbəti rəqibi turnirin sürpriz oyunçularından biri, 349-cu ATP reytinqində yer alan Yosuke Vatanuqi olacaq.
Vatanuqi, bu turnirdə möhtəşəm performans nümayiş etdirərək, ardıcıl qələbələr qazanıb. O, keçmiş dünya 17-cisi Frensis Tiafonu məğlub edərək 1/8 finala vəsiqə qazanıb. Yaponiya tennisçisi uzun müddət zədə səbəbindən kortlardan uzaq qalmışdı və bu nəticəsi onun üçün xüsusi əhəmiyyət daşıyır.
Digər maraqlı qarşılaşmada Sefanos Tsitsipas Matteo Berrettini üzərində inamlı qələbə qazanaraq qalibiyyət seriyasını yeddi oyuna qədər uzadıb. Yunan tennisçi 1/8 finalda Xolger Rune ilə qarşılaşacaq. Rune isə gərgin mübarizədə Uqo Umberi məğlub edib.
ABŞ tennisçisi Markos Xiron Kasper Ruudu məğlub etdikdən sonra qələbə seriyasını davam etdirərək Aleksey Popirinə qalib gəlib. Onun növbəti rəqibi Artyur Fis olacaq. Fransız tennisçi Lorenzo Muzetti üzərində dramatik qələbə qazanıb.
Sonuncu 1/8 final cütlüyü isə Tommy Pol və Daniil Medvedev arasında olacaq. Pol, Kameron Norriyə qalib gələrkən, Medvedevin rəqibi olan Aleks Mikelson zədə səbəbindən oyunu tərk edib.
Martın 11-nə keçən gecə Indian-Uells turnirində əsas setkanın aşağı hissəsində 1/16 final görüşləri baş tutacaq. Xüsusilə, fransız Gael Monfils və dünya ikinci raketkası Karlos Alkarasın çıxışları maraqla gözlənilir.
ATP 1000 Indian-Uells – 1/8 final cütlükləri (Yuxarı setka)
- Tallon Qriekspor – Yosuke Vatanuqi
- Xolger Rune [12] – Sefanos Tsitsipas [8]
- Markos Xiron – Artyur Fis [20]
- Tommy Pol [10] – Daniil Medvedev [5]
