Azərbaycan Basketbol Federasiyası (ABF) beynəlxalq səviyyəli “Lucentum Basketball Hub” adlı basketbol təşkilatına üzv olub.
Sport-az.com ABF-in mətbuat xidmətinə istinadən xəbər verir ki, tərəflər arasında bu əməkdaşlığı təsdiq edən rəsmi müqavilə imzalanıb.
“Lucentum Basketball HUB” layihəsi basketbol klublarını, akademiyaları, federasiyaları və idman sənayesində maraqlı tərəfləri bir araya gətirmək məqsədi daşıyır. Bu yenilikçi təşkilat, işbirlikləri yaratmaq, seminarlar keçirmək, təhsil proqramları və ortaq fəaliyyətlər üçün mərkəzi nöqtə rolunu oynayacaq. Məqsəd basketbolun meydanda və xaricində inkişafı üçün unikal bir məkan yaratmaqdır.
Təşkilat gənc istedadların inkişafını dəstəkləmək, məşqçilik metodlarını təkmilləşdirmək və idman elmi vasitəsilə yeni innovasiyaları təşviq etmək məqsədini daşıyır. Eyni zamanda, “Lucentum Basketball HUB” üzvləri arasında əlaqələrin möhkəmləndirilməsi ilə məşqçilər və oyunçular üçün beynəlxalq imkanlar yaradılması əsas prioritetdir.
Qeyd edək ki, “Lucentum Basketball HUB” təşkilatında Almaniya, Fransa, İspaniya, İtaliya, Litva və Latviya kimi ölkələrin klubları da iştirak edir. Ümumilikdə təşkilat 24 ölkə ilə əməkdaşlıq edir.
