Avrokubokların seçmə mərhələsində Kiprin “Anortosis” komandası ilə keçirilən cavab matçında 60:77 hesabıyla məğlub olan “Abşeron Lions”un baş məşqçisi Erhan Toker komandasının çıxışını şərh edib. Məğlubiyyətə baxmayaraq, Bakı təmsilçisi “şanslı məğlub” qaydası sayəsində turnirin əsas mərhələsinə vəsiqə əldə edib.
Toker bildirib: “Bu gün çox zəif oyun sərgilədik. İlk görüşdə 30 xalla önə keçmişdik, lakin fərqin 16 xalədək azalmasına imkan verdik. Cavab oyununun bizim üçün çətin keçəcəyini əvvəlcədən nəzərdə tutmuşdum, lakin yanıldığımı gördüm. Komandamızın heyətində də problemlər oldu: Gediminas Orelikin zədəsi və Ceyms Freyzerin psixoloji gərginliyi. Onun atası ağır vəziyyətdədir və bu, onun oyununa təsir etdi. Nə hücum, nə də müdafiə tərəfdən arzuolunan oyunu göstərə bilmədik. Əsas mərhələdə uğurlu çıxış üçün səhvlərimizi ciddi şəkildə düzəltməliyik”.
Qeyd edək ki, Avrokubokların əsas mərhələsində Azərbaycanı “Abşeron Lions”la yanaşı, “Neftçi” və “Sabah” klubları da təmsil edəcək.
