Azərbaycan futbolunun tanınmış simalarından biri, AFFA-nın sabiq baş katibi Çingiz İsmayılov 89 yaşında dünyasını dəyişib. Bu barədə məlumatı Azərbaycan Mətbuat Şurasının icraçı katibinin müavini, jurnalist İlqar Tağıyev öz sosial media hesabında paylaşıb.
“Bu gün Azərbaycan futbolunun əfsanələrindən biri, Çingiz İsmayılov vəfat etdi. 12 aprel tarixində 90 yaşı tamam olacaqdı…”, – deyə o bildirib. Mərhumun bir müddət öncə pnevmoniya diaqnozu ilə xəstəxanaya yerləşdirildiyi qeyd olunmuşdu.
Futbola həsr olunmuş ömür
Çingiz Məmməd oğlu İsmayılov 1935-ci ildə Bakıda dünyaya göz açıb. 1955–1962-ci illərdə “Neftçi”nin formasını geyinərək, komandanın önəmli oyunçularından biri olub. Daha sonra Bakının və Gəncənin “Dinamo” komandalarında da çıxış edib.
Futbolçu karyerasını başa vurduqdan sonra idman rəhbərliyində fəaliyyətini davam etdirən İsmayılov, 1994-cü ildə AFFA-nın baş katibi vəzifəsinə seçilib və bu postda tam 9 il çalışıb. Onun rəhbərlik etdiyi dövrdə Azərbaycan futbolunun idarəçilik strukturlarında mühüm dəyişikliklər baş verib.
Çingiz İsmayılovun vəfatı Azərbaycan idman ictimaiyyəti üçün böyük itkidir. O, həm futbolçu, həm də idman funksioneri kimi ölkə futboluna əvəzsiz töhfələr verib.
