Almaniyanın “Bayer” (Leverkuzen) klubu ölkə kubokunun 2024/25 mövsümündə sensasion şəkildə mübarizəni dayandırıb. Xabi Alonsonun yetirmələri yarımfinalda III divizion təmsilçisi “Arminiya”ya 1:2 hesabı ilə məğlub olaraq final şansını itirib.
Görüş Bilefeld şəhərində keçirilib və “Bayer” 17-ci dəqiqədə Coanatan Ta-nın qolu ilə önə keçib. Lakin meydan sahibləri cəmi 3 dəqiqə sonra – 20-ci dəqiqədə Marius Verl ilə hesabı bərabərləşdiriblər. İlk hissənin sonlarında, əlavə olunmuş 3-cü dəqiqədə Maksimilian Qroser “Arminiya”nı hesabda önə çıxarıb və bu, matçın son nəticəsi olub.
“Arminiya” tarix yazdı
Beləliklə, Almaniyanın üçüncü səviyyəli liqasında çıxış edən “Arminiya” kubokun finalına yüksələn ilk iştirakçı olub. Bu, klubun son illərdəki ən böyük uğurlarından biri hesab edilir.
Finaldakı rəqibi 2 aprel tarixində keçiriləcək “Ştutqart” – “Leyptsiq” qarşılaşmasından sonra məlum olacaq.
“Bayer” titulu qoruya bilmədi
Xatırladaq ki, “Bayer” ötən mövsüm Almaniya Kubokunun qalibi olmuşdu. Finalda onlar II Bundesliqa klubu “Kayzerslautern”i məğlub edərək kuboku başı üzərinə qaldırmışdılar. Lakin bu mövsüm favoritlərdən biri sayılan komanda sensasiyalı şəkildə turniri tərk etməli oldu.
