UEFA Çempionlar Liqasının 1/8 final mərhələsində Portuqaliyanın “Benfika” klubu ilə üz-üzə gələcək Azərbaycan çempionu “Araz-Naxçıvan” komandası bəzi itkilər səbəbindən heyətinə yeni futbolçular cəlb edib. Klubun vitse-prezidenti Mahmud Sadıqov açıqlamasında bildirdi ki, komanda “Baku Fire”nin üzvləri Kənan Manafov və Fərid Abbasovu icarə əsasında heyətə daxil edib.
Sadıqov əlavə etdi ki, bu qərar zədələr və sarı vərəqə cəzaları səbəbindən qəbul olunub. İlk oyunlarda Valerio Giovanny, Aleks Teyxeyra və Karlos Bertuola sarı vərəqəyə görə, Aleks Rezende isə zədəlidir. Bundan əlavə, “Neftçi”dən braziliyalı hücumçu İaqo Enrike Pereyra da əsas mərhələdən başlayaraq icarə əsasında komandada iştirak edir.
Qeyd edək ki, “Araz-Naxçıvan” və “Benfika” arasında ilk görüş 24 noyabrda Bakı İdman Sarayında keçiriləcək, cavab matçı isə 5 dekabrda Portuqaliyada baş tutacaq. Əgər “Araz-Naxçıvan” növbəti mərhələyə yüksələrsə, AEK (Yunanıstan) və “Sportinq” (Portuqaliya) qarşılaşmasının qalibi ilə qarşılaşacaq.
