2026-cı il dünya çempionatının Cənubi Amerika seçmə mərhələsinin 14-cü turunda Argentina yığması doğma meydanda Braziliyanı darmadağın etdi – 4:1. Bu, “selesao” üçün növbəti ağır itki ilə nəticələndi.
Matçın taleyi hələ ilk hissədə həll olundu: cəmi 31 dəqiqəyə qədər Argentina üç dəfə rəqib qapısına yol tapdı – qolları Xulián Álvares (4-cü dəq.), Enso Fernandes (12) və Aleksis Makallister (31) vurdu. Braziliya yalnız Matheus Cunha ilə bir cavab qolu (26) ilə kifayətləndi. İkinci hissədə isə oyuna nöqtəni Culiáno Simeone qoydu – 71-ci dəqiqədə hesabı 4:1 etdi.
Bu nəticə ilə Argentina 31 xalla turnir cədvəlinin liderliyindəki mövqeyini daha da möhkəmləndirdi. Ən yaxın izləyicisi olan Ekvadorla fərq artıq 8 xala çatıb. Braziliya isə 21 xalla dördüncü yerdə qərarlaşıb və turnir cədvəlində geriləməkdə davam edir.
Ekvador və Uruqvay xal itirdi, amma Uruqvay Braziliyanı keçdi
Bu turda həm Ekvador, həm də Uruqvay qolsuz heç-heçə ilə kifayətləndi. Ekvador səfərdə Çiliyə, Uruqvay isə Boliviyaya qarşı oynadı və hər iki matç 0:0 hesabı ilə başa çatdı. Bununla belə, Uruqvay əlavə göstəricilərə görə Braziliyanı keçərək 3-cü pilləyə yüksəldi.
Turnir cədvəlində vəziyyət belədir:
- Argentina – 31 xal
- Ekvador – 23 xal
- Uruqvay – 21 xal
- Braziliya – 21 xal
- Paraqvay – 21 xal
- Kolumbiya – 20 xal
- Venesuela – 15 xal
- Boliviya – 14 xal
- Peru – 10 xal
- Çili – 10 xal
Qeyd edək ki, Argentina mundiala vəsiqəni rəsmi olaraq təmin edən yeganə cənubi amerikalı komandadır.
