“Liverpul” klubunun baş məşqçisi Arne Slot, İngiltərə Baş Məşqçilər Assosiasiyası (LMA) tərəfindən 2024/25 mövsümünün ən yaxşı baş məşqçisi adına layiq görülüb.
Sport-az.com xəbər verir ki, bu nüfuzlu mükafat İngiltərə futbolunun əfsanəvi məşqçisi Sir Aleks Ferqyusonun adını daşıyır. Qeyd edək ki, sonuncu dəfə bu mükafata “Liverpul”un baş məşqçisi olaraq Yurgen Klopp 2021/22 mövsümündə layiq görülmüşdü. O zaman “qırmızılar” 92 xal toplayaraq Premyer Liqanı ikinci yerdə tamamlamışdı. Klopp həmçinin 2019/20 mövsümündə komandanı 30 illik fasilədən sonra İngiltərə çempionu etmiş və bu mükafata sahib olmuşdu.
Tarixdə bu mükafatı ən çox qazanan şəxs isə özü Sir Aleks Ferqyusondur — cəmi 11 dəfə.
Slotun çempion mövsümü
Slotun rəhbərliyi altında “Liverpul” 2024/25 mövsümündə 38 turda 84 xal toplayaraq Premyer Liqa çempionu olub. Komanda bu nəticə ilə “Arsenal”ı 10 xal qabaqlayıb və mövsümə damğasını vurub.
Qalibin adı 27 may tarixində, Londonda yerləşən JW Marriott Grosvenor House otelində keçirilən 33-cü LMA illik mükafatlandırma mərasimində açıqlanıb.
