Avropanın beş aparıcı liqasında mövsüm sona yaxınlaşır. Bundesliqa və Liqa 1-də son tur qalıb, A Seriyası və Premyer Liqada iki, La Liqada isə üç tur oynanmalıdır. Hələ də bəzi ölkələrdə çempion müəyyənləşməyib, digər tərəfdən, Çempionlar Liqasına vəsiqə uğrunda mübarizə hələ də davam edir.
Premyer Liqa: “Mançester Siti” yoxsa “Çelsi” kənarda qalacaq?
İngiltərədə birinci yer artıq “Liverpul” tərəfindən zəbt edilib. Amma ikinci-dördüncü yerlər uğrunda mübarizə hələ də açıqdır. Altı komanda Çempionlar Liqasına düşmək üçün yarışır:
- Arsenal – 68 xal
- Nyukasl – 66
- Mançester Siti – 64
- Çelsi – 63
- Aston Villa – 63
- Nottingem Forest – 62
“Mançester Siti” son iki oyunda “Bornmut” və “Fulhem”lə qarşılaşacaq. Qvardiolanın komandası bu mövsüm “Bornmut”a iki dəfə uduzub – vəziyyət düşündüyünüz qədər asan deyil.
Ən maraqlı oyunlardan biri isə “Nottingem” – “Çelsi” matçıdır. London təmsilçisi artıq iki mövsümdür ki, Avropanın əsas turnirindən uzaqdır.
La Liqa: Mbappe və Levandovskidən Pichichi mübarizəsi
“Barselona”nın “Real” üzərindəki qələbəsi çempionluq məsələsini demək olar ki, bağladı. Fərq yeddi xala çatdı, Kataloniya klubu sadəcə iki xal toplamaqla titulu təmin edə bilər.
Amma əsl rəqabət bombardir yarışında gedir. Mbappe “klasiko”dakı het-triki ilə Levandovskini keçdi – 27:25. Polşalı ulduz isə zədə səbəbindən son oyunlarda meydanda yox idi.
A Seriyası: “Napoli” yoxsa “İnter”?
İtaliyada hər şey son iki tura qalıb. “Napoli” “Cenoa” ilə heç-heçə edəndən sonra “İnter” bir xal geridədir. Hər iki komandanın qarşısında çətin və motivasiyalı rəqiblər var:
- “İnter” – “Latsio” və “Komoya” qarşı
- “Napoli” – “Parma” və “Kalyari” ilə qarşılaşacaq
Qeyd edək ki, “Komoya” son altı matçını qalibiyyətlə başa vurub, bu isə “İnter” üçün çətin rəqib deməkdir.
Sonuncu Çempionlar Liqası bileti üçün bu komandalar mübarizə aparır:
- Yuventus – 64
- Latsio – 64
- Roma – 63
- Bolonya – 62
- Milan – 60
- Fiorentina – 59
“Roma”nın “Atalanta”ya uduzması Bergamo təmsilçisinin yerini rəsmiləşdirdi.
Bundesliqa: “Leypsiq” mübarizədən düşür?
“Bayer” və “Bavariya” artıq ilk iki pillədə yerini möhkəmləndirib. Dördüncü yer üçün “Frayburq” və Dortmund “Borussiya”sı yarışır.
“Leypsiq” isə hazırda avrokuboklardan kənarda qalır. Son turda “Ştutqart”a qalib gəlib, “Maynts”ın xal itirməsinə ümid edəcəklər.
Liqa 1: “Monako” ikinci olacaq?
Fransada çempion çoxdan bəllidir – PSJ. Amma ikinci və üçüncü yerlər uğrunda yarış davam edir. “Monako” “Marsel”dən cəmi bir xal geridədir.
- “Monako” – “Lans”a qarşı (səfərdə)
- “Marsel” – “Renn”lə oynayacaq (evdə)
Alt sıralarda isə “Havr” mövsümü sağ-salamat başa vurmağa çalışır. Son turda “Strasburq”la oyun onların taleyini müəyyənləşdirə bilər.
