Beynəlxalq Badminton Federasiyası (BWF) dünyanın ən yaxşı gənc badmintonçularının reytinqini açıqlayıb.
Sport-Az xəbər verir ki, Azərbaycan badmintonçuları Ülvi Hüseynov və Həcar Nuriyeva ilk dəfə dünya reytinqində ilk 100-lüyə daxil olublar.
- Ülvi Hüseynov beynəlxalq turnirlərdə uğurlu çıxışları ilə 63-cü pilləyə yüksəlib. İran və Türkiyədə keçirilən yarışlarda medal qazanan badmintonçunun ümumi reytinq xalları 4 050-yə çatıb.
- Həcar Nuriyeva 2023-2024-cü illərdə Tacikistan, İspaniya, Türkiyə, Zambiya və Botsvanada təşkil olunan yarışlarda mükafat qazanaraq 21 pillə irəliləyib və 47-ci yerə yüksəlib. O, bu il İranda keçirilən turnirdə Leyla Camalzadə ilə cütlük yarışında qızıl medal əldə edərək ümumi xalını 5 800-ə yüksəldib.
Ülvi Hüseynov 2023-cü ildən Malayziya Badminton Akademiyasında təhsil alır və bu ölkənin müxtəlif yaş qruplarındakı milli komandaları ilə birgə təlim-məşq toplanışlarında iştirak edir.
Azərbaycan Badminton Federasiyası 2025-2028-ci illər üçün strategiyasında yerli idmançıların dünyanın ən yaxşı 100 badmintonçusu sırasında yer almasını əsas hədəflərdən biri kimi müəyyən edib.
