Azərbaycan beynəlxalq cüdo arenalarında qazanılan mükafatların sayına görə dünya liderlərindən biri olaraq, 8-ci sırada qərarlaşıb. 2024-cü ilin sentyabr ayının ortalarına qədər böyüklər, kadetlər, kiçiklər və veteranlar arasında keçirilən yarışlarda ölkəmiz ümumilikdə 156 medal qazanıb (49 qızıl, 36 gümüş, 71 bürünc). Bu nailiyyət Azərbaycanı dünya medal sıralamasında cüdonun yaradıcıları olan Yaponiyanı qabaqlamağa imkan verib.
İdman.biz xəbər verir ki, Yaponiya 47 qızıl, 20 gümüş və 42 bürünc mükafatla 9-cu yerdədir.
Azərbaycan cüdosunun beynəlxalq uğurlarının əsas göstəricilərindən biri də Paris Olimpiadasındakı çıxışlardır. Hidayət Heydərov (73 kq) və Zelim Kotsoyev (100 kq) çempion olub, Azərbaycan yalnız Yaponiyadan geri qalaraq ümumi hesabda ikinci yeri tutub.
Bundan əvvəl bu iki lider idmançımız Abu Dabi dünya çempionatında da böyük uğur qazanıblar. Dünya Turu yarışlarında ölkəmizin “Böyük dəbilqə” turnirində çıxışı da möhtəşəm olub: Zelim Tskayev (81 kq), Murad Fətiyev (90 kq) və Hidayət Heydərov (73 kq) qızıl medallarla ölkəmizi təmsil ediblər.
Hidayət Heydərov və Elcan Hacıyevin Avropa çempionatında qazandıqları qızıl medalları da xatırlamaq yerinə düşərdi. Elcan Hacıyev bu mövsümdə artıq beş dəfə müxtəlif yarışlarda fərqlənib, o cümlədən Paris və Tbilisidə keçirilən “Böyük dəbilqə” turnirlərində finala çıxıb və Astanada bürünc medal qazanıb.
Hazırkı mövsümdə medal sıralaması olduqca gərgindir. Azərbaycan altıncı yerdə olan Ukraynanı 1 qızıl medal fərqi ilə təqib edir (Ukraynanın 50, Azərbaycanın 49 qızıl medalı var). Əlcəzair isə gümüş və bürünc medalların sayına görə Azərbaycanı qabaqlayır, lakin qızıl medallar üzrə bərabərlik var.
Ümumi medal sıralamasına liderlik edən ölkələr arasında Fransa birinci yerdədir (124 qızıl, 104 gümüş və 190 bürünc), onu Gürcüstan (70 qızıl, 61 gümüş, 101 bürünc) və Özbəkistan (69 qızıl, 45 gümüş, 99 bürünc) izləyir.
