İspaniyanın Linares şəhərində davam edən dünya şahmat çempionatında Azərbaycanın qadınlardan ibarət komandası bu gün 1/4 final mərhələsində Gürcüstan millisi ilə qarşılaşacaq. Qarşılaşma iki matçlıq seriya şəklində keçiriləcək.
Belə ki, əgər iki oyundan sonra tərəflər arasında üstünlük müəyyən olunmazsa, yarımfinala vəsiqə sahibi sabah keçiriləcək tay-breyk matçı ilə qərarlaşacaq. Azərbaycan yığmasının heyətində Ülviyyə Fətəliyeva, Gövhər Beydullayeva, Xanım Balacayeva, Gülnar Məmmədova və Ayan Allahverdiyeva iştirak edir. Komandanın kapitanı isə İlahə Qədimovoğlu-dur.
Qeyd edək ki, turnir 23 noyabr tarixində başa çatacaq və Azərbaycan millisinin uğurlu çıxışı ölkəmizin beynəlxalq səviyyədə adını daha da ucaldacaq.
