Azərbaycan Şahmat Çempionatında finala yüksələn iştirakçılar bəlli olub. Turnirin yarımfinal mərhələsində Teymur Rəcəbov və Rauf Məmmədov arasındakı sürətli şahmat qarşılaşması heç-heçə ilə yekunlaşsa da, armageddon partiyasında Rauf Məmmədov qalib gəldi.
Qadınlar arasında finalçılar isə tay-brek oyunlarından sonra müəyyənləşdi. Günay Məmmədzadə, Gülnar Məmmədovanı 1.5:0.5 hesabı ilə məğlub edərək finala yüksəldi. Digər yarımfinal görüşündə isə Gövhər Beydullayeva, Ülviyyə Fətəliyevaya qalib gələrək (1.5:0.5) adını finala yazdırdı.
Beləliklə, final qarşılaşmalarında:
- Kişilər: Şəhriyar Məmmədyarov – Rauf Məmmədov
- Qadınlar: Günay Məmmədzadə – Gövhər Beydullayeva
Üçüncü yer uğrunda mübarizədə isə:
- Kişilər: Mİsradin İsgəndərov – Teymur Rəcəbov
- Qadınlar: Gülnar Məmmədova – Ülviyyə Fətəliyeva
Final görüşləri 13 fevral tarixində saat 15:00-da Landmark Biznes Mərkəzində baş tutacaq. Qeyd edək ki, kişilər arasında çempionatın ümumi mükafat fondu 60 000 manat, qadınlar arasında isə 30 000 manat təşkil edir.
