Avqustun 7-17-də Çində, Çenqdu şəhərində keçiriləcək Ümumdünya Oyunlarında Azərbaycan gimnastikanın üç növündə iştirak edəcək.
Sport-az.com xəbər verir ki, Azərbaycan təmsilçilərindən ilk vəsiqəni Birmingemdə (Böyük Britaniya) keçirilən tamblinq üzrə dünya çempionatında qalib olan Mixail Malkin qazanıb.
Bundan sonra, akrobatlarımız Portuqaliyanın Gimaraeş şəhərində keçirilən Dünya kubokunda üç yer qazanıblar. Raziyə Seyidli – Ağasif Rəhimov qarışıq cütlüyü iki dəfə qızıl medal qazanaraq yarışa vəsiqə əldə edib. Eyni zamanda, Murad Rəfiyev – Daniel Abbasov dueti də iki qızıl medal qazanıb. Kişilərdən ibarət komanda – Riad Səfərov, Rəsul Seyidli, Abdulla Əl-Meşaihi və Seymur Cəfərov isə bürünc medal qazanaraq Ümumdünya Oyunlarında iştirak hüququ qazanıb.
Pesaroda (İtaliya) keçirilən dünya çempionatında gümüş medal qazanan Mədinə Mustafayeva – Vladimir Dolmatov qarışıq aerobika cütü də Çenqduda ölkəmizi təmsil edəcək.
