FIDE sürətli və blits şahmat üzrə Dünya Çempionatının formatını dəyişdiyini elan edib. Yarış 26-31 dekabr tarixlərində Nyu-Yorkda keçiriləcək.
Sport-az xəbər verir ki, çempionatın yeni formatı nokaunt sistemini əhatə edəcək və əlavə olaraq, mətbuat günü təşkil ediləcək. Bu gün “Chess Davos” adlı nüfuzlu konfransın keçirilməsi ilə yadda qalacaq. Konfrans şahmat və maliyyə dünyalarını bir araya gətirəcək.
Blits üzrə dəyişikliklər əsasən iki mərhələdən ibarət olacaq. Birinci mərhələ ənənəvi İsveçrə sistemi üzrə keçiriləcək. Açıq kateqoriyada 13 tur, qadınlar arasında isə 11 tur oynanılacaq. Zaman nəzarəti hər gediş üçün 3 dəqiqə + 2 saniyə olacaq. Ən yaxşı səkkiz iştirakçı nokaunt mərhələsinə vəsiqə qazanacaq. Bu mərhələdə matçlar dörd oyundan ibarət olacaq.
Çempionatın ümumi mükafat fondu 1,5 milyon ABŞ dollarıdır.
Nyu-Yorkdakı çempionatda Azərbaycanın ən azı altı şahmatçısı iştirak edəcək. Onlar ölkə üzrə sürətli və blits şahmat çempionatında uğurlu nəticələr əldə edərək bu hüququ qazanıblar. Təmsilçilərimiz arasında Eltac Səfərli, Vüqar Rəsulov, Məhəmməd Muradlının, Gülnar Məmmədova, Zeynəb Məmmədyarova və Xanım Balacayeva yer alır.
