Britaniyalı Tayson Fyuri deyib ki, Tayson 90 yaşında belə rəqibini nokauta göndərə bilər. Lakin KİV-lər qeyd edir ki, boksçunun bədəni yorğunluq və zərbələrə necə reaksiya verəcək, bilinmir. Mayk Tayson isə formasını bərpa etdiyini və döyüşə hazır olduğunu bildirir.
Bu həftə əfsanəvi boksçu Mayk Tayson videobloqqer Ceyk Pol ilə döyüşəcək. Döyüş ABŞ-ın Texas ştatının Arlinqton şəhərində, AT&T Stadium-da baş tutacaq və Netflix-də canlı yayımlanacaq.
Ceyk Pol – Mayk Tayson: Döyüş vaxtı
Azərbaycan vaxtı ilə döyüş 16 noyabrda, şənbə səhəri saat 05:00-da başlayacaq.
Mayk Taysonun 19 illik fasilədən qayıdışı
Tayson 58 yaşında Pol ilə döyüşə çıxır. Səhhətindəki problemlərə görə döyüşü iyulun 20-dən noyabrın 15-nə təxirə salmışdı. BoxingScene-ə verdiyi müsahibədə isə özünü döyüşə tam hazır hesab etdiyini bildirib.
Əvvəllər ən gənc ağır çəkili çempion olan Tayson sonuncu dəfə 2005-ci ildə peşəkar döyüşə çıxıb. O vaxtdan bəri Tayson həyatı ilə bağlı dəyişikliklər etdiyini vurğulayıb və Pola döyüşə ciddi yanaşmağı məsləhət görüb.
Ceyk Pol – Mayk Tayson: Döyüş qaydaları
Netflix izah edir ki, hər iki boksçu 14-unsiyalıq (397 qram) əlcəklər geyinəcək. Döyüş səkkiz raunddan ibarət olacaq və boksçulara rəqibi nokauta göndərmək icazəsi verilib.
Ceyk Pol – Mayk Tayson: Proqnozlar
CBS Sports Polun hələ də peşəkar boks təcrübəsinin az olduğunu bildirir və Taysonun yaşının bu döyüş üçün balans yaratdığını vurğulayır. USA Today-ə danışan dünya çempionu Bermein Stivern Taysonun qalib gələcəyinə inanır. O, Taysonun 2020-ci ildə Roy Cons ilə sərgilədiyi formaya işarə edərək, döyüşün altı raunddan çox çəkməyəcəyini düşünür.
Roy Cons da Taysonun Polu məğlub edə biləcəyini düşünür. Britaniyalı boksçu Tayson Fyuri isə “Dəmir Mayk”ın hətta 90 yaşında da rəqibini nokauta göndərə biləcəyini vurğulayıb.
Rəsmi qonorar açıqlanmasa da, Ceyk Pol 40 milyon dollar qazanmağı planlaşdırdığını bildirib. Mayk Taysonun isə dostu Henri Sehudo-nun dediyinə görə təxminən 20 milyon dollar qazanacağı gözlənilir.
