UFC-nin ən böyük adlarından biri olan Con Conz ilə təşkilatın rəhbəri Deyna Vayt arasında gərginlik yeni mərhələyə yüksəlib. Döyüşçü sosial şəbəkədə yayımladığı açıqlamada ona edilən “aşağı qiymətli” müqavilə təklifinə görə UFC-dən ayrılmağa hazır olduğunu bildirib.
Ağ Evdə keçiriləcək UFC tədbiri mübahisə yaratdı
Son aylarda Conz 14 iyunda Ağ Evdə təşkil olunacaq UFC tədbirinə qatılmaq istədiyini açıq şəkildə bildirirdi.
Lakin şənbə günü açıqlanan döyüş kartında onun adı yer almadı. Deyna Vayt isə sonrakı açıqlamasında Conzun “heç vaxt bu tədbir üçün real namizəd olmadığını və karyerasını bitirdiyini düşündüyünü” deyib. Conz isə bunun əksini iddia edir. O, X sosial platformasında belə yazıb:
“Biz UFC ilə bu döyüş üçün real danışıqlar aparırdıq. Mən hətta ilkin tələbimi aşağı saldım. Amma əvəzində mənə hörmətsiz bir təklif göndərildi. Əgər UFC düşünür ki, mənimlə bağlı hər şey qaydasındadır, o zaman xahiş edirəm, bu gün müqaviləmi ləğv etsinlər.”
38 yaşlı döyüşçü saxta məlumatlara da münasibət bildirib. Bir müddət əvvəl yayılan videoda onun sol bud oynağında artrit olduğu və bud sümüyünə protez qoyulmasının lazım ola biləcəyi deyilirdi. Vayt da bu görüntüləri onun döyüşməyə qadir olmadığına sübut kimi təqdim etmişdi.
Conz isə vəziyyəti belə izah edib:
“Bəli, budumda artrit var və ağrı hiss edirəm. Amma bu, döyüşməyəcəyim anlamına gəlmir. Əgər aşağı qiymətə razı olsaydım, birdən sağlam olacaqdım və Ağ Ev kartına salınacaqdım? Bu məntiqsizdir.”
Conzun son döyüşü və gələcək taleyi
MMA tarixinin ən güclü idmançılarından biri hesab edilən Conq Conz son dəfə 2024-cü ilin noyabrında Sipe Mioçiçi məğlub edərək ağır çəki titulunu qorumuşdu.
O, 2025-ci ildə karyerasını bitirdiyini açıqlamış, lakin Ağ Ev tədbirinin elanından sonra geri dönmək istədiyini bildirmişdi.
İndi isə döyüş dünyası bir sualın cavabını gözləyir: Conz həqiqətən UFC-dən ayrılacaq, yoxsa tərəflər yenidən danışıqlara qayıdacaq?
