2026-cı il Dünya Çempionatının Avropa zona seçmə mərhələsində daha 8 oyun keçirilib. Matçlar E, F, I və K qruplarında təşkil olunub və bu oyunlar komandaların final mərhələsinə vəsiqə uğrunda sərt mübarizəsini davam etdirdiyini göstərib.
Belə ki, E qrupunda İspaniya öz meydanında Bolqarıstanı 4:0 hesabı ilə məğlub edib, Türkiyə isə Gürcüstan üzərində 4:1 qələbə qazanaraq qrupdakı mövqeyini gücləndirib.
F qrupunda Portuqaliya və Macarıstan arasında 2:2 nəticələnən qarşılaşma ilə yanaşı, İrlandiya erməniləri 1:0 hesabı ilə səfərdə məğlub edib.
I qrupunda Estoniya ilə Moldova arasında 1:1 hesablı heç-heçə qeydə alınarkən, İtaliya İsraili 3:0 hesabı ilə məğlub edib.
K qrupunda isə İngiltərə səfərdə Latviya üzərində 5:0 qələbəyə imza atıb, Andorra Serbiyadan 1:3 hesabı ilə geri qalıb.
Bu nəticələr hər bir qrupda komandaların mövqeyinə təsir göstərərək, seçmə mərhələnin gərgin mübarizəsini daha da ön plana çıxarır.
