Əfsanəvi ingilis futbolçusu Devid Bekhem Britaniya sarayından yüksək şərəf alacaq. Sport-az.com “The Sun” nəşrinə istinadla xəbər verir ki, keçmiş milli futbolçu “ser” fəxri tituluna layiq görüləcək.
Rəsmi açıqlama yaxın günlərdə
Bekhemin rəsmi olaraq “ser” – cəngavər-bakalaur elan olunması bu ayın sonunda açıqlanacaq. Bu addım nəticəsində yalnız Devidin özü deyil, həyat yoldaşı Viktoriya Bekhem də “ledi” ünvanına sahib olacaq.
Uzun illər gözlənilən mükafat
Bekhemə bu titulun verilməsi ideyası illər əvvəl gündəmə gəlib. Onun ilk dəfə 2011-ci ildə namizədliyi irəli sürülmüşdü. O zaman futbolçu 2012-ci il London Yay Olimpiadasının təşkili üçün gördüyü işlərə görə təklif edilmişdi. Lakin həmin vaxt vergi yayınması ilə bağlı qalmaqallara adı qarışdığı üçün namizədlik rədd edilmişdi.
Xeyriyyəçilik və kral ailəsi ilə əməkdaşlıq
Devid Bekhem “Mançester Yunayted” klubundakı uğurlarından başqa, uzun illər xeyriyyəçilik fəaliyyəti ilə də fərqlənib. O, hazırda III Karlın xeyriyyə fondu ilə fəal əməkdaşlıq edir və 2023-cü ildə rəsmi olaraq fondun səfiri elan olunub.
Qeyd edək ki, 2003-cü ildə mərhum Kraliça II Yelizaveta Devid Bekhemi Britaniya İmperiyası Ordeni ilə təltif edərək ona “ofitser” statusu vermişdi. Lakin bu status “ser” titulunu daşımaq hüququ vermirdi. Yeni titul sayəsində isə Bekhem rəsmi olaraq “Ser Devid Bekhem” adlandırıla biləcək.
