Böyük Britaniyanın ağır çəki üzrə tanınmış boksçusu Dillian Uayt keçmiş dünya çempionu Entoni Coşua ilə mümkün revanş barədə yayılan xəbərlərə münasibət bildirib. Təcrübəli idmançı belə bir döyüşün baş tutacağı halda ringə çıxmağa hazır olduğunu gizlətməyib.
Uayt açıqlamasında bildirib ki, bu qarşılaşma həm onun, həm də azarkeşlər üçün maraqlı olardı:
“Bu döyüş baş tutsa, məmnuniyyətlə razılaşaram. Mənimlə Coşuanın artıq öz tarixi var və bizim döyüşlər həmişə maraqlı keçir. Qələbə, məğlubiyyət və ya heç-heçə – fərq etməz, bu qarşılaşma yenə də baxımlı olacaq”.
Britaniyalı boksçu qeyd edib ki, Coşuanın hazırkı mərhələdə digər rəqiblərlə döyüşmək istəyi də başadüşüləndir:
“Əlbəttə, o, yəqin ki, mənimlə deyil, Tayson Fyuri ilə döyüşmək istərdi. Bu, karyeramızın hansı mərhələsində olmağımızla bağlıdır. Amma mənə təklif gəlsə, imtina etməyəcəyəm”.
Uayt əlavə edib ki, o, karyerası boyu həmişə ən güclü rəqiblərlə qarşılaşmağa çalışıb və bu prinsipə sadiq qalacaq.
Xatırladaq ki, iki boksçu artıq bir neçə dəfə üz-üzə gəlib. 2008-ci ildə həvəskar səviyyədə keçirilən döyüşdə Uayt qalib gəlib. 2015-ci ildə isə peşəkar rinqdə keçirilən qarşılaşmada Entoni Coşua rəqibini nokautla məğlub edib.
Onların revanş döyüşü 2023-cü ilin avqust ayına planlaşdırılsa da, Uaytın dopinq testindən keçə bilməməsi səbəbindən baş tutmamışdı. Hazırda isə tərəflər arasında mümkün yeni qarşılaşma yenidən müzakirə mövzusuna çevrilib.
