34 yaşlı mərkəz müdafiəçisi İnyiqo Martines “Barselona” ilə yollarını ayıraraq Səudiyyə Ərəbistanının “Əl-Nəsr” klubuna keçəcək.
Təcrübəli futbolçu yaxın günlərdə katalon klubu ilə müqaviləsini ləğv edəcək və “Əl-Nəsr”ə azad agent kimi qoşulacaq. Onun yeni klubu ilə müqaviləsi 2026-cı ilin yayına qədər nəzərdə tutulur və əlavə bir illik uzadılma opsiyası da mövcuddur.
Martines 2023-cü ildə “Barselona”ya keçmişdi. Bu müddət ərzində o, 71 oyunda meydana çıxaraq 3 qol vurub və 6 qolun ötürməsini verib.
İnyiqo Martines yay transfer dövründə “Əl-Nəsr”in heyətinə qatdığı ilk tanınmış futbolçu deyil. Daha əvvəl klub “Çelsi”nin hücumçusu Juao Feliksi heyətinə qatmış və bu transferə 30 milyon avro xərcləmişdi.
“Əl-Nəsr” ötən Səudiyyə Ərəbistanı çempionatını üçüncü pillədə tamamlayıb. Komandanın yeni mövsümdəki ilk oyunu 19 avqustda ölkə Superkubokunun yarımfinalında “Əl-İttihad”a qarşı olacaq.
