Azərbaycanlı qrossmeyster Eltac Səfərli, İndoneziyada keçirilən beynəlxalq şahmat turnirində əldə etdiyi qələbədən sonra təəssüratlarını bölüşüb. sport-az.com-un məlumatına görə, Eltac Səfərli **“report”**a verdiyi açıqlamada turnirin yaxşı keçdiyini və bəzi qarşılaşmalarda daha çox xal toplamaq imkanının olduğunu bildirib.
Turnirdəki çıxış və nəticələr
Şahmatçı bildirib ki, turnir onun üçün ümumilikdə rahat keçib: “Turnir mənim üçün yaxşı, rahat keçdi. İkinci turun oyunu çətin oldu. Yeganə məğlub olduğum görüşdə bərabər vəziyyətdə çox risk etdim. Digər bütün qarşılaşmalarda demək olar üstünlük tərəfimdə idi. Bəlkə də daha çox xal toplaya bilərdim. Yenə də 11 oyunda 8,5 xal yaxşı nəticədir.”
Səfərli 11 turdan ibarət yarışda 8,5 xal toplayaraq bütün rəqiblərini üstələyib və turnirin qalibi olub.
Turnirin keçirilməsi və rəqiblər
Turnirin qapalı formatda keçirildiyini bildirən Eltac Səfərli, reytinq cəhətdən belə yarışlarda oynamağın çətin olduğunu vurğulayıb: “Çünki şahmatçıların əksəriyyəti daha az reytinqə sahib idi. Tanınmışlardan hindistanlı qrossmeyster Sethuraman Panayappan var idi. Hansı ki, uzun illər 2650-2700 əmsalla oynayırdı. Avstraliyalı qrossmeyster Teymur Kuybokarov da iştirak edirdi. Ümumilikdə 7 ölkədən 12 şahmatçı iştirak edirdi. Demək olar, hər biri öz millilərinin üzvləridir.”
Turnirin mükafat fondu və gələcək planlar
Turnir A və B qruplarından ibarət olub. Yarışın ümumi mükafat fondu 40 min dollar təşkil edib. Gələcək planları barədə danışan Eltac Səfərli bildirib ki, o, aprel ayında “Reykyavik Open” turnirində iştirak etməyi planlaşdırır.
