“Ən-Nəsr” klubunda yaxın günlərdə ciddi dəyişikliklərin həyata keçirilməsi planlaşdırılır.
Komandanın ulduz hücumçusu Kriştianu Ronaldu klub rəhbərliyi ilə görüşdə idarəetmədə buraxılan əvvəlki səhvlərin aradan qaldırılacağına dair rəsmi təminat əldə edib.
Klub daxilində borcların bağlanması və struktur dəyişikliyi
Məlumata görə, “Ən-Nəsr” rəhbərliyi ilk növbədə klub əməkdaşlarına olan bütün maliyyə öhdəliklərini tam şəkildə ödəməyi hədəfləyir. Bu addım həm daxili sabitliyi artırmaq, həm də komanda daxilində yaranmış narazılıqları minimuma endirmək məqsədi daşıyır.
İnzibati struktura gəlincə, genişmiqyaslı dəyişikliklər gündəmdədir. Müzakirələrə əsasən, Direktorlar Şurasının sədri Abdulla Əl-Macedin mümkün istefası istisna olunmur. Klub rəhbərliyində aparılacaq dəyişikliklərin komandada idarəetmənin keyfiyyətini artıracağı gözlənilir.
Bundan əlavə, klubun dekabr ayında vəzifələrindən kənarlaşdırdığı Joze Semedu və Simau Koutinyonun yenidən əvvəlki səlahiyyətlərinə qaytarılması planlaşdırılır. Bu addımın qərarvermə prosesində peşəkarlığın və davamlılığın təmin edilməsi baxımından önəmli olduğu bildirilir.
Ronaldu isə klubun atacağı bu addımları komandanın gələcək planları üçün müsbət dönüş nöqtəsi kimi qiymətləndirib. Portuqaliyalı hücumçunun komandanın idarəetməsi ilə bağlı təsir gücünün artdığı da qeyd olunur.
