Avropa Gimnastikasının (EG) prezidenti Fərid Qayıbov keçən ayın əsas hadisələrinə dair fikirlərini bölüşüb.
Sport-az.com-in məlumatına görə, Qayıbov Avropa Gimnastikası rəsmi saytında yayımlanan “Prezidentin qeydləri” rubrikasında təşkilatın həyata keçirdiyi vacib tədbirləri və qəbul edilən qərarları qiymətləndirib.
“Sentyabrın əvvəlində Budapeştdə, Beynəlxalq Gimnastika Federasiyasının (FIG) 85-ci Konqresinə hazırlıq məqsədilə görüş keçirildi. Bu görüşdə EG-yə üzv olan federasiyaların nümayəndələri iştirak edirdi. Qarşıdakı Konqres çərçivəsində baş tutacaq seçkiləri və müxtəlif məsələləri müzakirə etdik. Mən 43 ölkənin nümayəndələrinə təşəkkürümü bildirirəm, çünki onlar tədbirdə iştirak edərək dəyərli fikirlərini bölüşdülər. Digər 7 ölkənin nümayəndələri görüşə qatıla bilməsələr də, müzakirələri yüksək qiymətləndirdilər,” – deyə Qayıbov bildirib.
Görüş zamanı müzakirə edilən mövzularla bağlı geniş və canlı diskussiyalar aparılıb. Namizədlərin çıxışlarını dinləmək maraqlı olub və bu, səmərəli müzakirələrə səbəb olub. Qayıbov qeyd edib ki, belə tədbirlər federasiyalar arasında əməkdaşlığı gücləndirir və qarşılıqlı anlaşmanı yeni səviyyəyə çıxarır.
Qayıbov həmçinin, sentyabrda EG-in Prezident Şurası və İcraiyyə Komitəsinin iclaslarının keçirildiyini vurğulayıb. Bu iclaslarda 2024-cü il üçün Tibbi, 2025-ci il üçün isə Texniki reqlamentlər təsdiq edilib. Bundan əlavə, aerobika və “TeamGym” üzrə Avropa çempionatlarının keçiriləcəyi şəhərlər müəyyənləşdirilib. Eyni zamanda, 2026 və 2027-ci illərdə idman gimnastikası üzrə Avropa çempionatlarının keçirilməsi üçün tender elan edilib.
Sentyabrın ikinci yarısında isə diqqət üç qeyri-olimpiya idman növünə yönəlib. Portuqaliyanın Gimarayeş şəhəri akrobatika üzrə dünya çempionatına ev sahibliyi edib. Eyni zamanda, İtaliyanın Pesarosu şəhəri aerobika üzrə dünya çempionatını qəbul edib. Qayıbov bildirib ki, bu tədbirlər çox yüksək səviyyədə təşkil olunub və iştirak edən gimnastlar heyrətamiz çıxışlar nümayiş etdiriblər.
Bundan əlavə, sentyabrın 22-27-də Bolqarıstanın Burqas şəhərində “Golden Age Gym Festival”ı keçirilib. Bu tədbir “Gymnastics for All” konsepsiyası çərçivəsində təşkil olunub və burada 19 ölkədən 1500-dən çox iştirakçı qatılıb. Festival çərçivəsində iştirakçılar ustad dərslərində iştirak ediblər, şəhərlərdə çıxışlar ediblər və müxtəlif sosial tədbirlərdə aktiv iştirak ediblər.
Qayıbov həmçinin qarşıdakı tədbirlər haqqında da danışıb. O, oktyabrın 16-19-da Bakıda keçiriləcək “TeamGym” üzrə Avropa çempionatının ilin ən böyük yarışlarından biri olacağını vurğulayıb. Qayıbov bildirib ki, bu gimnastika növü hər il daha çox inkişaf edir və çempionat həmişə böyük maraqla qarşılanır. Oktyabrda baş tutacaq digər önəmli hadisə isə FIG Konqresi və seçkiləridir. O, bütün namizədlərə uğurlar arzulayıb və seçkilərin gimnastikanın gələcəyinə müsbət təsir göstərəcəyini qeyd edib.
O həmçinin FIG prezidentliyinə namizədliyini irəli sürdüyünü təsdiqləyib. O vurğulayıb ki, gimnastikanın inkişafı naminə daha çox diqqət tələb edən sahələr var və o, bu idman növünün daha geniş miqyasda təbliği və inkişafı üçün öz töhfəsini verməyə hazırdır.
“Biz hamımız gimnastika həvəskarlarıyıq, və bizim məqsədimiz eynidir: qəbul etdiyimiz hər bir qərar bu idmanın parlaq gələcəyinə xidmət edir,” – deyə Fərid Qayıbov fikrini yekunlaşdırıb.
