Beynəlxalq Şahmat Federasiyası (FIDE), Freestyle Chess Grand Slam Tour turnirində iştirak etməyi planlaşdıran şahmatçılara 4 fevral tarixinə qədər alternativ dünya çempionatlarından imtina sənədini imzalamaq şərti qoyub.
Bu barədə FIDE-nin rəsmi açıqlamasında bildirilir. Federasiya hesab edir ki, turnirin təşkilatçıları onun dünya çempionatı ilə bağlı mövcud nüfuzunu tanımır və dünya çempionunu müəyyən etmək üçün rəsmi prosedurdan kənar öz yarışlarını təşkil edirlər.
FIDE-nin narazılığı nə ilə bağlıdır?
Federasiya turnirin dünya çempionatı kimi təqdim edilməsindən narahatdır və onun rəsmi status alması üçün tərəflərlə razılığa gələ bilmədiyini bildirir. “Freestyle Chess Tour təşkilatçıları FIDE-nin dünya çempionu tituluna dair səlahiyyətlərini qəbul etməməyi və elit şahmatçılardan ibarət qapalı yarış keçirməyi üstün tutublar. Açıq və şəffaf təsnifat prosesi olmadan keçirilən bu turnir dünya çempionatı hesab edilə bilməz”, – FIDE-nin bəyanatında deyilir.
Freestyle Chess Grand Slam Tour nədir?
Bu turnirin təşkilatçıları norveçli şahmatçı Maqnus Karlsen və almaniyalı investor Yan Henrik Büttnerdir. Yarış Fişer şahmatı formatında keçirilir, burada fiqurlar partiyadan əvvəl təsadüfi qaydada düzülür. Turnir seriyasında ən çox xal toplayan şahmatçı “dünya çempionu” elan edilir.
Karlsen və FIDE arasında davam edən gərginlik
Son illərdə Maqnus Karlsen və FIDE arasında bir neçə münaqişə yaşanıb.
- 2022-ci ildə Karlsen dünya çempionu titulundan imtina etdi, çünki FIDE onun çempionluq matçının formatı ilə bağlı təklif etdiyi radikal islahatları qəbul etmədi.
- 2024-cü ilin dekabrında o, sürətli və blits şahmat çempionatını tərk etdi. Bunun səbəbi FIDE-nin dress-kodla bağlı mövqeyi olub. O vaxt şahmatçı federasiya ilə münasibətləri “müharibə vəziyyətində olmaq” kimi təsvir etmişdi.
