Azərbaycan Futbol Federasiyaları Assosiasiyasının İntizam Komitəsi bu gün keçirdiyi iclasda ən ağır cəzanı Region Liqasında çıxış edən “İmişli Bələdiyyəspor”un futbolçusu Allahverdi Fərzəliyevə verdi. “Ağsu” ilə matçda qırmızı vərəqə aldıqdan sonra hakimi itələyən və ayaqla zərbə endirən oyunçu 14 oyunluq diskvalifikasiya olunub. Qarşılaşma yarımçıq dayandırılıb və komandaya 0:3 hesablı texniki məğlubiyyət yazılıb.
Dörd komanda texniki məğlubiyyət aldı
İntizam Komitəsi eyni iclasda daha üç komandanı texniki məğlubiyyətlə cəzalandırıb. U-14 Qızlar Liqasında “Pirallahı” və “Ümid” heyətdə yetərli oyunçu çıxara bilmədiyi üçün, Region Liqasında isə “Ərgünəş” təcili tibbi yardım təmin etmədiyinə, “Bakı” isə lisenziyasız futbolçu oynatdığına görə cəza alıb.
Premyer Liqa məşqçiləri də cəzadan yayınmayıb
Misli Premyer Liqasının XIII turundakı “Şamaxı” – “Sumqayıt” matçı sonrası hər iki baş məşqçi cəzalandırılıb. “Şamaxı”nın çalışdırıcısı Ayxan Abbasov rəqib texniki zonaya aqressiv daxil olduğu üçün 1 oyunluq diskvalifikasiya edilib, klub 2000 manat cərimə ödəyəcək. “Sumqayıt”ın baş məşqçisi Saşa İliç isə qeyri-etik davranışa görə 4 oyunluq cəzalanır, komandasına 10 000 manat əsas cərimə və 700 manat sarı vərəqələrə görə əlavə ödəniş yazılaraq ümumi məbləğ 10 700 manat olub.
Bundan başqa, Əvəzedicilər Liqasında “Şamaxı-2”nin məşqçisi Yaşar Abuzərov hakimi təhqir etdiyi üçün 4 oyunluq cəza alıb, klub 1000 manat ödəyəcək. “İmişli” azarkeşlərin pirotexniki istifadəsinə görə 3000 manat, “Qəbələ” isə futbolçu Murad Musayevin qırmızı vərəqəsinə görə 500 manat cərimələnib.
Bir gündə ümumi cərimə məbləği 18 200 manatı ötüb. AFFA futbolumuzda nizam-intizamı yüksək səviyyədə saxlamaqda qətiyyətli olduğunu bir daha göstərib.
