Azərbaycan I Liqasında XIX turun oyunlarına start verilib və ilk oyun günü maraqlı nəticələrlə yadda qalıb. Tur çərçivəsində həm liderin iştirakı ilə qarşılaşma, həm də iddialı komandaların duelləri azarkeşlərin diqqətini cəlb edib.
Günün əsas görüşlərindən birində “Baku Sportinq” Buzovna qəsəbəsində “Mingəçevir”i qəbul edib. Paytaxt və bölgə təmsilçilərinin mübarizəsində qalib müəyyənləşməyib. Erkən dəqiqələrdə hesabı açan tərəf meydan sahibləri olub, lakin qonaqlar fasiləyə qədər bərabərlik qolunu vuraraq oyunda tarazlığı bərpa ediblər. Görüşün qalan hissəsində tərəflər hesabı dəyişə bilməyib və matç 1:1 hesabı ilə başa çatıb.
Lider azlıqda qələbə qazandı
Turun digər diqqət çəkən qarşılaşmasında lider “Şəfa” doğma meydanda “Şahdağ Qusar”ı qəbul edib. Oyunun 26-cı dəqiqəsində Xəyal Tomarov qırmızı vərəqə alaraq meydandan kənarlaşdırılıb və Bakı təmsilçisi uzun müddət azlıqda oynamağa məcbur qalıb. Buna baxmayaraq, komanda ilk hissənin sonlarında fərqlənərək qələbə qolunu vurmağı bacarıb.
Qarşılaşmanın son dəqiqələri də gərgin keçib. Qonaq komandanın futbolçusu Aqostinyo Çipesse əlavə olunmuş vaxtda qırmızı vərəqə alaraq meydanı tərk edib. Nəticədə “Şəfa” minimal hesablı qələbə ilə liderliyini daha da möhkəmləndirib.
Günün son matçında isə “Səbail” və MOİK komandaları üz-üzə gəlib. Bu oyunda da qalib müəyyənləşməyib və tərəflər 2:2 hesablı heç-heçə ilə kifayətləniblər.
XIX turun ilk oyun gününün nəticələri
- “Baku Sportinq” – “Mingəçevir” 1:1
Qollar: İ.Allahverdiyev, 8 – K.Kalunqa, 34 - “Şəfa” – “Şahdağ Qusar” 1:0
Qol: E.Zamanov, 45 - “Səbail” – MOİK 2:2
Qollar: R.Voronsov, 64; Q.Səfərov, 86 – S.Fərəcov, 19; M.Məmmədzadə, 69
