Bu gün Azərbaycanda keçirilən III MDB Oyunlarının proqramı son dərəcə zəngindir – səkkiz müxtəlif idman növü üzrə yarışlar davam edir. Məlumatına görə, Qəbələ Olimpiya Kompleksində stolüstü tennis üzrə final və həlledici qarşılaşmalar baş tutacaq.
Qəbələnin şəhər stadionunda isə 16 yaşadək milli futbol komandaları arasında oyunlar keçiriləcək. B qrupunda Belarus və Özbəkistan, A qrupunda isə Qırğızıstan və Tacikistan yığmaları güclərini sınayacaqlar.
Eyni zamanda, Qəbələ Atıcılıq Klubunda stend atıcılığı üzrə təsnifat və final raundları baş tutacaq. Səhərin idman gündəmində Gəncə İdman Sarayındakı üzgüçülük yarışları və burada başlanacaq voleybol qarşılaşmaları da var. Gəncədə A qrupunda Azərbaycan və Tacikistan, B qrupunda isə Belarus və Qırğızıstan milliləri voleybol üzrə mübarizə aparacaq.
Göygöldəki Olimpiya Kompleksində sambo üzrə qaliblər müəyyənləşəcək. Yevlax Olimpiya İdman Kompleksində isə boks yarışları keçiriləcək, Mingəçevir Kür Olimpiya Mərkəzində isə taekvondoçular ilk döyüşlərinə çıxacaqlar.
