Azərbaycanın birinci liqasında 16 mövsümdür mübarizə aparan və iki dəfə çempion olmuş “Qaradağ Lökbatan” futbol klubu fəaliyyətini dayandırır. Klubun birinci liqadakı taleyinə 26-cı turdan sonra rəsmi olaraq aydınlıq gəldi. Son turda səfərdə “Kərvan”la 2:2 hesablı heç-heçə edən “Qaradağ Lökbatan” sonuncu pilləni tərk edə bilmədi və bununla da mövsüm bitməmiş aşağı liqaya düşməsi rəsmiləşdi.
Rəhbərlik qərarını açıqladı
Sport-az.com-un məlumatına görə, klub rəhbərliyi məğlubiyyətin ardından baş məşqçi və futbolçularla görüşərək komandanın növbəti mövsümdə II Liqada iştirak etməyəcəyini bəyan edib. Klub rəhbərliyi komandanın birinci liqada qalmaq uğrunda mübarizədə uğursuz çıxış etdiyini əsas gətirərək yeni mövsümdə maliyyə ayırmayacaqlarını bildirib. Beləliklə, “Qaradağ Lökbatan” futboldan çəkildiyini rəsmən açıqlamasa da, mövcud formasında fəaliyyətinə son qoyur.
Tarixi uğurlar və çətinliklər
2009/10 mövsümündə “Neftçi-İSM” adı ilə yarışlara qoşulan klub, iki il sonra “Qaradağ Lökbatan” adını aldı. Aşağı dəstədə ən stabil çıxış edən kollektivlərdən biri olan Lökbatan təmsilçisi 16 il boyunca mütəmadi olaraq yüksək nəticələr göstərdi. Klub 2011/12 və 2021/22 mövsümlərində birinci liqanın qalibi oldu, lakin Premyer Liqaya yüksəlmək üçün lisenziya ala bilmədi.
Bundan əlavə, komanda 2012/13, 2015/16, 2017/18 və 2023/24 mövsümlərində ikinci, 2013/14 mövsümündə isə üçüncü yeri tutaraq dəfələrlə medal qazanıb. Lakin həmin nailiyyətlər elitaya yüksəlmək üçün kifayət etməyib.
Pandemiya mövsümündə də sonuncu olmuşdu
“Qaradağ Lökbatan” daha əvvəl 2019/20 mövsümünü də sonuncu sırada tamamlamışdı. Amma o mövsüm pandemiya səbəbilə yarımçıq dayandırıldığından, və aşağı dəstə mövcud olmadığından komanda liqada qalmışdı. Bu dəfə isə vəziyyət fərqlidir – rəqiblərindən geri qalan komanda mövsüm başa çatmamış mübarizəni uduzub.
Statistika və cari mövqe
Hazırda “Qaradağ Lökbatan” 23 xalla 13 komandalı liqada sonuncu yeri tutur. Bir tur qalmış “Difa” və “Cəbrayıl” komandalarından 3 xal geridə olan Lökbatan təmsilçisi bərabər xal halında belə, qələbə sayı az olduğu üçün onları geridə qoya bilməyəcək.
