Dünyanın bir nömrəli tennisçisi Yannick Sinner antidopinq qaydalarını pozduğuna görə üç ay müddətinə diskvalifikasiya edilib. İtaliyalı idmançının cəzası 4 may 2025-ci ildə başa çatacaq. Sport-Az xəbər verir ki, bu barədə rəsmi məlumatı Ümumdünya Antidopinq Agentliyi (WADA) yayıb. WADA-nın açıqlamasına görə, Sinner üç aylıq diskvalifikasiyanı qəbul edib və bununla bağlı məhkəmə çəkişməsinə ehtiyac qalmayıb.
Dopinq testi və qərarın səbəbi
- Sinnerin dopinq testi 10 mart 2024-cü ildə Amerikanın İndian-Uells şəhərində keçirilən “Masters” turniri zamanı götürülüb.
- Nəticədə aşağı miqdarda klostebol metaboliti aşkarlanıb.
- 8 gün sonra götürülən ikinci testdə də eyni maddə tapılıb.
Tennisçi müvəqqəti yarışlardan uzaqlaşdırılma qərarına etiraz edib və turnirlərdə iştirakını davam etdirib. O, maddənin bədəninə komanda üzvünün istifadə etdiyi müalicəvi spreydən keçdiyini bildirib. Beynəlxalq Tennis Dürüstlük Agentliyi (ITIA) bu izahı məntiqli hesab edərək onun yarışlarda qalmasına icazə verib.
Lakin WADA qərarla razılaşmayaraq daha sərt cəza tələb edirdi. Agentlik Sinnerin ən azı 1-2 il müddətinə diskvalifikasiya olunmasını istəyirdi, lakin sonda kompromis qərar qəbul edilib və diskvalifikasiya müddəti üç ay olaraq təsdiqlənib.
