Klublararası Dünya Çempionatının G qrupunda baş tutan qarşılaşmada İngiltərə nəhəngi “Mançester Siti” Mərakeşin “Vidad” klubunu 2:0 hesabı ilə məğlub etdi.
“Lincoln Financial Field” stadionunda keçirilən oyunda “şəhərlilər” artıq ilk hissədə hesabı təyin etdilər. Oyunun 2-ci dəqiqəsində Fil Foden qola imza atdı, 42-ci dəqiqədə isə Ceremi Doku onun ötürməsini dəqiq zərbə ilə tamamlayaraq fərqi iki topa çatdırdı. Fodenin qol+pas performansı sayəsində Pep Qvardiolanın komandası fasiləyə üstün yollandı və bu hesab oyunun sonuna qədər dəyişmədi.
“Vidad” əsasən müdafiə planı ilə çıxış etsə də, zaman-zaman təhlükəli hücumlar qurmağa çalışdı. Buna baxmayaraq, “Mançester Siti”nin müdafiə xətti etibarlı təsir bağışladı. Oyunun 88-ci dəqiqəsində “şəhərlilər”in futbolçusu Rico Lyuis qırmızı vərəqə alaraq komandasını azlıqda qoydu, lakin bu, hesabın dəyişməsinə təsir etmədi.
Növbəti oyunlar:
- 22 iyun – “Vidad” “Yuventus”la qarşılaşacaq
- 23 iyun – “Mançester Siti” “Əl-Ayn” ilə üz-üzə gələcək
