Keçmiş tennis ulduzu Mariya Şarapova Los-Ancelesin nüfuzlu Manhetten-Biç rayonundakı okean mənzərəli malikanəsini satışa çıxarıb. Qeyd edək ki, evdə tennis kortu yoxdur.
38 yaşlı, bir vaxtlar dünya reytinqində birinci olan və 2004–2014-cü illərdə Böyük Dəbilqə turnirlərində beş dəfə qalib gəlmiş Mariya Şarapova, britaniyalı iş adamı və nişanlısı Aleksandr Gilkslə birlikdə malikanəni satmaq qərarına gəlib. Bu barədə The Wall Street Journal satış agenti, Carolwood Estates şirkətindən Syuzan Perrimanın sözlərinə istinadən məlumat yayıb.
Agentin bildirdiyinə görə, satışın səbəbi cütlüyün ailələri ilə daha çox vaxt keçirmək üçün Avropaya köçmək planlarıdır. Şarapova və Gilksin üç yaşlı oğulları var.
Şarapova 2012-ci ildə okean mənzərəli bu torpaq sahəsini 4,1 milyon dollara alıb və evin dizaynını Los-Ancelesdə yerləşən KAA Design memarlıq studiyasına sifariş edib. Tikinti 2015-ci ildə tamamlanıb.
Hazırda Carolwood Estates-in satış bazasında bu ev görünmür, lakin Şarapovanın özü tərəfindən aparılan malikanə turu videosu evin necə göründüyü barədə təsəvvür yaradır.
Malikanənin xüsusiyyətləri:
- Geniş və hündür tavanlı giriş zalı, beton divarlar.
- Qonaq otağı və mətbəx birləşdirilib, çıxış birbaşa hovuza açılır.
- Beş yataq otağı var.
- Sahibin yataq otağına aid vanna otağı terasla birləşir.
- Zirzəmidə iki bowling zolağı yerləşir.
- Həyətdə barbekü zonası da var.
- Tennis kortu isə nəzərdə tutulmayıb.
Redfin əmlak şirkətinin məlumatına görə, Manhetten-Biçdə yaşayış evlərinin orta qiyməti ötən illə müqayisədə 4,6% artaraq iyun ayında 3,4 milyon dollara çatıb. Bildirilir ki, bu rayona maraq Pacific Palisades bölgəsində baş verən yanğınlardan sonra daha da artıb.
Agentin sözlərinə görə, Şarapova və Gilks həmçinin Floridada da evə sahibdirlər.
