Peşəkar boks tarixinin iki əfsanəsi – Mayk Tayson və Floyd Meyvezer – növbəti dəfə diqqət mərkəzinə düşüblər. Məlumata görə, hər iki tərəfin nümayəndələri Konqo Demokratik Respublikasında sərgi xarakterli döyüş keçirmək barədə razılığa gəliblər.
Amerikalı idman jurnalisti Mayk Koppingerin bildirdiyinə əsasən, qarşılaşmanın 25 aprel tarixində təşkili planlaşdırılır. Danışıqların ötən ilin sentyabr ayından davam etdiyi vurğulanır.
“Rumble in the Jungle” ruhunda gecə
Tayson və Meyvezerin bu döyüşü 1974-cü ildə Məhəmməd Əli ilə Corc Forman arasında Kinşasada keçirilmiş məşhur “Rumble in the Jungle” qarşılaşmasının ab-havasında təşkil etmək istədikləri bildirilir. Həmin tarixi gecə Məhəmməd Əlinin qələbəsi ilə nəticələnmiş və o, dünya kəmərlərini birləşdirmişdi.
59 yaşlı Tayson sonuncu dəfə təxminən ilyarım əvvəl Texasda bloqer Ceyk Pol ilə sərgi döyüşündə rinqə çıxıb. O qarşılaşmada səkkiz raunddan sonra hakimlərin yekdil qərarı ilə məğlub olub. “Dəmir Mayk” 2005-ci ildə karyerasını başa vurub. Onun peşəkar statistikası 50 qələbə (44-ü nokautla) və 6 məğlubiyyətdən ibarətdir.
Floyd Meyvezer isə məğlubiyyətsiz karyerası ilə boks tarixinin ən uğurlu adlarından sayılır. O, beş müxtəlif çəki dərəcəsində dünya çempionu olub və 50 peşəkar döyüşün hamısında qalib gəlib. Meyvezerin ən məşhur sərgi xarakterli görüşlərindən biri irlandiyalı Konor Makqreqorla qarşılaşması olub və həmin döyüşü də o qazanıb.
Son illərdə sərgi döyüşləri boks dünyasında geniş maraq doğurur. Bu tip qarşılaşmalar milyonlarla dollar gəlir gətirməklə yanaşı, qlobal media diqqətini də özünə çəkir. Tayson və Meyvezerin mümkün qarşılaşması da idman ictimaiyyətində böyük rezonans yaradıb.
