Ağır çəkidə keçmiş dünya çempionu Mayk Tayson bir daha rinqə qayıtmağa hazırlaşır. Yaşı 60-a çatan əfsanəvi boksçunun növbəti qarşılaşmasının isə kifayət qədər səs-küylü olacağı gözlənilir. Məlumata görə, bu dəfə onun rəqibi hələ də məğlubiyyət tanımayan Floyd Meyvezer olacaq.
Tayson sonuncu dəfə 2024-cü ildə uzun fasilədən sonra rinqə çıxmışdı. 19 illik fasiləni başa vuraraq geri dönən məşhur boksçu həmin vaxt internet fenomeni və peşəkar boksçu Ceyk Pol ilə qarşılaşmışdı. Gərgin və mübahisəli keçən döyüşdə Tayson məğlub olmuşdu.
Döyüşdən sonra o, karyerasını davam etdirmək niyyətində olduğunu gizlətməmiş və “Bunun son döyüş olub-olmayacağını bilmirəm, amma çox güman ki, yox” sözləri ilə geri dönüş siqnalı vermişdi.
Növbəti sınaq: məğlubedilməz Meyvezer
Son məlumatlara əsasən, Mayk Tayson yenidən rinqə çıxacaq və bu dəfə onun rəqibi dünya boksunun ən uğurlu adlarından biri – Floyd Meyvezer olacaq. Qarşılaşmanın sərgi döyüşü formatında keçirilməsi planlaşdırılır və artıq rəsmi təsdiqin verildiyi bildirilir. Lakin döyüşün dəqiq tarixi hələ açıqlanmayıb.
Floyd Meyvezer karyerası ərzində 5 fərqli çəki dərəcəsində dünya çempionu olub və WBC, WBA, IBF, WBO kimi aparıcı federasiyalarda titul qazanıb. Ən diqqətçəkən məqam isə onun 50 döyüşdə heç bir məğlubiyyət almamasıdır.
Bu qarşılaşma baş tutarsa, iki böyük boks ulduzunun rinqdə üz-üzə gəlməsi idman dünyasında böyük maraq doğuracaq və milyonlarla azarkeşin diqqətini cəlb edəcək.
