10 aprel tarixində KONKAKAF Çempionlar Kubokunun 1/4 final mərhələsinin cavab oyunu keçirildi. “İnter Mayami” doğma meydanda “Los Anceles”i qəbul etdi və 3:1 hesabı ilə qalib gələrək ümumi nəticədə 3:2 üstünlük qazandı və yarımfinala yüksəldi.
Görüş Fort Loderdeyldə yerləşən “Çeyz Stadium”da baş tutdu. Oyunun qəhrəmanı, sözsüz ki, argentinalı superulduz Lionel Messi oldu. O, bu oyunda dubl edərək komandasını növbəti mərhələyə daşıdı. İlk qolunu oyun epizodundan sonra, ikinci qolu isə 84-cü dəqiqədə penaltidən vurdu. Digər qolu isə Noah Allen hesabına yazdırdı.
Qonaqların heyətində yeganə qol müəllifi Aaaron Long oldu – o, həm də bu ikili qarşılaşmada ilk qolu vuran futbolçu idi. Maraqlıdır ki, hakim “İnter Mayami”nin iki qolunu saymadı: əvvəlcə 31-ci dəqiqədə Messi qaydaları pozaraq fitdən əvvəl zərbə endirdi, 67-ci dəqiqədə isə Luis Suaresin qolu ofsayd səbəbilə qeydə alınmadı. Suares əlavə olunmuş vaxtda (90+5) əvəzləndi, digər “Barselona”nın sabiq oyunçusu Jordi Alba isə bütün oyunu əvəzolunmadan keçirdi.
“Los Anceles”in heyətində olan ukraynalı müdafiəçi Artem Smolyakov da bu dəfə ehtiyat oyunçular skamyasında əyləşdi və oyuna qoşulmadı.
Yarımfinalda “İnter Mayami” “Vankuver” – “Pumas” cütünün qalibi ilə qarşılaşacaq. Qeyd edək ki, bu cütün ilk oyunu 1:1 hesabı ilə başa çatıb. Artıq turnirin digər yarımfinal cütlüyü bəllidir: “Krus Asul” – “UANL Tiqres”.
