“Barcelona”nın “Girona” üzərində 4:1 hesablı qələbəsindən sonra, “Girona”nın baş məşqçisi Michel Lamine Yamalın Lionel Messi kimi əfsanəvi futbolçunun səviyyəsinə yüksələ biləcəyini deyib. Yeniyetmə futbolçu bu qarşılaşmada iki qol vuraraq “Barcelona”nı 2:0 hesabı ilə irəli çıxartdı və möhtəşəm formunu bir daha sübut etdi.
Oyundan sonra mətbuat konfransında Michel Yamalı yüksək qiymətləndirərək onu dünyaca məşhur Messi ilə müqayisə edib. “Lamine fərq yaradan bir oyunçudur,” – Michel deyib. “Mənim üçün o, artıq 17 yaşında dünyanın ən yaxşı futbolçularından biridir. Messidən sonra belə bir oyunçunun ortaya çıxacağını təsəvvür etmək çətindir, amma ümid edirəm ki, Yamal inkişaf etməyə davam edər, çünki o, Messi səviyyəsinə çata biləcək bir oyunçudur.”
Lamine Yamal Barcelona-da oynadığı müddət ərzində dəfələrlə Messi ilə müqayisə edilib, lakin o, hər zaman bu cür danışıqları təvazökarlıqla qarşılayıb. Yenidən Messi səviyyəsinə çatmağın “mümkünsüz” olduğunu vurğulayıb.
