Azərbaycan çempionu “Qarabağ” potensial transfer istiqamətində növbəti addımını atıb. Klub Nigeriyadan olan gənc futbolçunu düşərgəsinə dəvət edərək onun imkanlarını yaxından dəyərləndirməyə başlayıb. Söhbət “Komfort Edge” klubunun üzvü Onyema Çukvumaobimdən gedir.
Afrika mətbuatında yayılan məlumatlara görə, sol cinahda çıxış edən futbolçu artıq Azərbaycana gəlib və bir müddət Ağdam təmsilçisinin məşq prosesində iştirak edəcək. Onun performansı məşqçilər korpusu tərəfindən diqqətlə izlənəcək.
Seçim “Obasa Cup” turnirində edilib
Məlumata əsasən, bu futbolçu “Qarabağ” akademiyasının baş koordinatoru Aftandil Hacıyevin diqqətini Nigeriyada keçirilən “Obasa Cup” turniri zamanı cəlb edib. Həmin yarışda nümayiş etdirdiyi sürət, texnika və cinahdakı aktiv oyunu onun seçilməsində əsas rol oynayıb.
Gənc vingerin əsas üstünlükləri arasında sürətli hücumlara qoşulması, topu yaxşı idarə etməsi və fərdi ustalığı qeyd olunur. Məhz bu keyfiyyətlərə görə klub onu daha yaxından sınamaq qərarına gəlib.
“Qarabağ” rəhbərliyi futbolçunun adaptasiya qabiliyyətinə və taktiki uyğunluğuna xüsusi diqqət yetirəcək. Əgər o, məşqlər və yoxlama prosesində özünü doğrulda bilsə, tərəflər arasında rəsmi müqavilənin imzalanması gündəmə gələ bilər.
Ağdam klubu son illərdə gənc və perspektivli legionerlərin seleksiyasında fəal olub və bu siyasət komandanın uğurlarında mühüm rol oynayıb. Onyema Çukvumaobimin də həmin siyahıya qoşulub-qoşulmayacağı yaxın günlərdə məlum olacaq.
