Məşhur məşqçi Piter Fyuri hesab edir ki, kikboks üzrə dünya çempionu Riko Verhovenin Aleksandr Usik üzərində mümkün qələbəsi ağır çəki boks tarixinin ən böyük sensasiyalarından biri ola bilər.
Onun sözlərinə görə, bu qarşılaşma mayın 23-də Misirdə, Giza piramidalarının fonunda baş tutacaq və Verhoven üçün ciddi sınaq olacaq. Fyuri bildirib ki, Verhovenin qələbəsi hətta boks tarixindəki ən məşhur sürpriz nəticələrlə müqayisə oluna bilər.
O, Endi Ruisin Entoni Coşuanı məğlub etməsini (2019), Lennoks Lyuisin Həsim Rəhman üzərində qələbəsini (2001), həmçinin Ceyms “Baster” Duqlasın Mayk Taysonu sensasion şəkildə nokaut etməsini (1990) xatırladıb. Həmin döyüşlərdə autsayderlərin qalib gəlməsi boks tarixində xüsusi yer tutur.
Fyurinin müqayisəsi və açıqlaması
Piter Fyuri qeyd edib ki, Verhovenin qələbəsi onun üçün hətta Tayson Fyurinin Vladimir Kliçko üzərində 2015-ci ildə qazandığı məşhur qələbədən də böyük hadisə ola bilər:
“Bu, ən yüksək səviyyəli nailiyyət olardı. Digər döyüşlərdə hamı peşəkar boksçular idi, amma mənim döyüşçüm kikboksçudur. Bu isə onun cəmi ikinci peşəkar boks döyüşüdür”.
O əlavə edib ki, bir çox ekspertlər vaxtilə Tayson Fyuriyə də şans vermirdi:
“Hamı deyirdi ki, o, maksimum iki raund qazana bilər. Amma reallıq fərqli oldu. Üslublar döyüşləri müəyyən edir. Riko sadəcə pul üçün rinqə çıxmır, o, hər şeyini ortaya qoyacaq”.
Usik favoritdir, amma şans var
Məşqçi Usikin yüksək səviyyəli boksçu olduğunu etiraf etsə də, Verhovenin şanslarının tamamilə sıfır olmadığını vurğulayıb:
“Usik fenomenal idmançıdır, bunu hamı bilir. Amma əgər kimsə Rikonu ciddiyə almırsa, bu böyük səhvdir. O, böyük çəkili, güclü və çevik döyüşçüdür”.
Fyurinin fikrincə, Verhoven üçün ən real qələbə yolu nokautdur:
“Onu xalla məğlub etmək çox çətin olacaq. Güclü zərbə tapmaq vacibdir, amma balansı da qorumaq lazımdır”.
Qeyd edək ki, Riko Verhoven GLORY təşkilatında ağır çəki üzrə uzun illər çempion olub və 2015-ci ildən məğlubiyyət tanımır. O, boy və çəki baxımından (195 sm, 123 kq) Usikdən (193 sm, 107 kq) üstün olsa da, ukraynalı boksçu texniki ustalığı və təcrübəsi ilə favorit hesab olunur.
Usik peşəkar karyerasında məğlubiyyət yaşamayıb və son döyüşündə Daniel Dyubuanı nokaut edərək ikiqat mütləq dünya çempionu titulunu qazanıb.ф
