Futbol üzrə Azərbaycan Premyer Liqasında çıxış edən komandaların 2024-cü il üçün maliyyə hesabatlarının əsas göstəriciləri açıqlanıb. Ötən illə müqayisədə liqa üzrə ümumi gəlirin təxminən 19 faiz artması klubların kommersiya aktivliyi, sponsorluq və UEFA turnirlərində çıxışların təsiri ilə izah olunur. Premyer Liqa klublarının ümumi büdcəsinin böyük hissəsi yenə də ilk üç klubun payına düşür.
Liderlərin gəlirləri və pay bölgüsü
2024 maliyyə ilində “Qarabağ” Futbol Klubu gəlirlərə görə əsas favorit statusunu qoruyub. Ağdam təmsilçisinin illik gəliri 34 milyon 753 min 800 manat təşkil edib. Klubun Avropa turnirlərində qrup mərhələsinə müntəzəm vəsiqə qazanması, beynəlxalq televiziya və PR dəyəri bu göstəricini formalaşdıran əsas amillərdəndir. İkinci sırada 28 milyon 617 min 506 manat gəlirlə “Neftçi” qərarlaşıb. Paytaxt təmsilçisinin gəlir mənbələri arasında sponsor müqavilələri, bilet və atribut satışı, eləcə də transfer əməliyyatları mühüm rol oynayır. İlk üçlüyü 26 milyon 953 min 800 manatlıq gəlirlə “Sabah” tamamlayır. Son illərdə infrastruktur və akademiyaya sərmayə qoyan bu klubun maliyyə güclənməsi turnir cədvəlində iddialı mövqe ilə müşayiət olunur.
Daha aşağı sıralarda olan klubların 2024-cü il üzrə gəlirləri aşağıdakı kimidir:
- “Zirə” – 10 milyon 968 min 897 manat,
- “Səbail” – 9 milyon 292 min 900 manat,
- “Sumqayıt” – 9 milyon 178 min 600 manat.
Region təmsilçiləri sırasında :
- “Araz-Naxçıvan” 6 milyon 208 min 100 manat,
- “Turan Tovuz” 6 milyon 145 min 200 manat,
- “Şamaxı” 5 milyon 586 min manat, “Kəpəz” isə 3 milyon 711 min 300 manat gəlir göstərib.
Pay bölgüsünə əsasən, Premyer Liqada formalaşan ümumi gəlirin 25 faizi “Qarabağ”a, 21 faizi “Neftçi”yə, 20 faizi isə “Sabah”a məxsusdur. Bu rəqəmlər çempionatda idman nəticələri ilə maliyyə gücünün paralel inkişaf etdiyini ortaya qoyur.
