Azərbaycanın aparıcı futbol klublarından olan “Qarabağ” 2024-cü ilin maliyyə hesabatını açıqlayıb. Klubun rəsmi saytında dərc olunan sənəddə illik gəlir və xərclər balansı, həmçinin maliyyə nəticələri öz əksini tapıb.
Büdcə və gəlirlər
2024-cü ildə Ağdam təmsilçisinin ümumi büdcəsi 34 753 800 manat təşkil edib. Gəlir mənbələri aşağıdakı kimi bölünüb:
- Teleyayım hüquqları – 28 154 800 manat
- Sponsor və reklam gəlirləri – 466 100 manat
- Bilet satışından gəlir – 1 741 900 manat
- Digər gəlirlər – 831 000 manat
- Futbolun İnkişaf Fondundan dəstək – 3 560 000 manat
Əsas xərclər və zərər
Ən böyük xərc maddəsi əməkhaqqı və mükafatlara ayrılıb – bu sahəyə 20 648 300 manat yönəldilib. Maliyyə hesabatına əsasən, “Qarabağ” FK 2024-cü ili 876 900 manat məbləğində zərərlə başa vurub. Klubun son illərdəki avrokubok uğurlarına baxmayaraq, açıqlanan nəticələr maliyyə dayanıqlılığının qorunmasının vacibliyini bir daha ortaya qoyur.
