Ağdamın “Qarabağ” futbol klubu Azərbaycan Misli Premyer Liqasında 3-cü turun təxirə salınmış oyununda “Şamaxı” üzərində 1:0 hesablı qələbə qazanaraq növbəti qış çempionluğunu təmin edib.
Sport-az.com xəbər verir ki, Qurban Qurbanovun rəhbərlik etdiyi komanda bu mövsümdə 44 xal toplayaraq ikinci pillədə qərarlaşan “Araz-Naxçıvan” klubundan 5 xal öndədir. Beləliklə, “Qarabağ” ardıcıl 4-cü, ümumilikdə isə 11-ci qış çempionluğunu qazanıb.
“Qarabağ”ın Liderliyi
Bu nailiyyətlə “Qarabağ”, qış çempionluqları üzrə “Neftçi”ni (9 dəfə) və digər klubları – “Kəpəz”, “Şamaxı” (hər biri 3 dəfə), “Xəzri”, “Şəmkir”, “Karvan”, “Xəzər-Lənkəran” və “Şüvəlan”ı (hər biri 1 dəfə) geridə qoyub.
Qeyd edək ki, 1992 və 1993-cü illərdə çempionatlar “yaz-payız” sistemi üzrə keçirilib.
