AFFA-nın İntizam Komitəsinin növbəti iclası baş tutub və Misli Premyer Liqasının XXVIII turu çərçivəsində qeydə alınan neqativ hallar üzrə qərarlar qəbul olunub.
“Qarabağ” klubu növbəti dəfə azarkeş davranışları ilə əlaqədar maliyyə itkisinə məruz qalıb. Komanda azarkeşlərinin stadionda pirotexniki vasitələrdən istifadə etməsi səbəbindən klub 1500 manat məbləğində cərimələnib. “Qarabağ”la oyunda dörd futbolçusu sarı vərəqə alan “Turan Tovuz” isə 700 manat cərimə ilə üzləşib. “Neftçi” komandası “Araz-Naxçıvan”la qarşılaşmada altı oyunçusunun xəbərdarlıq alması səbəbindən AFFA tərəfindən 700 manat məbləğində cərimə olunub.
“Araz-Naxçıvan” isə matçın gec başlamasına görə 800 manatlıq cərimə ödəməli olacaq. Qarşılaşma, oyunçulardan birinin geyimindəki nasazlığa görə nəzərdə tutulan vaxtdan gec başlamışdı.
Bundan əlavə, “Kəpəz” azarkeşləri “Səbail”lə matç zamanı Tovuz şəhər stadionunda altı oturacağı qıraraq maddi ziyana səbəb olublar. Klub bu ziyanın qarşılanması üçün məsuliyyət daşıyacaq.
